記者：趙慧敏
攝影：楊錦文
Model： Kit.J、 Hazel@ GME
拆解配件違法陷阱
無錯，警察總係望到你平日唔留意嘅嘢，一心以為只係 Upgrade架車。現時唔少汽車用品或者配件，都係外形省鏡又可帶畀駕駛者唔少方便，不過其實部份配件，已經違反咗本港交通條例，隨時「中伏」，搞到要硬啃牛肉乾又或者被人捉去強制驗車就唔好啦。今次搵嚟香港道路安全議會委員蒙海強提提大家幾個最容易誤踩嘅陷阱，等大家可以趨吉避凶。
1 DVD唔睇都犯法
今時今日裝 DVD機好普通，可以睇住屏幕倒車之外，停車時可以睇吓 DVD，夠晒爽。計埋條數，音響同 DVD屏幕嘅價錢又唔相差得遠，裝 DVD抵好多喎！不過如果你咁諗就隨時偷雞唔到蝕揸米，事關根據交通條例，擺正喺中控台又或駕駛者可以睇到或反射到嘅屏幕，只可以顯示車輛本身資訊又或者導航資料，如果屏幕可以播放 DVD又或者電視娛樂節目，就算你齋裝唔睇都係違法，最高可被罰款$10,000及監禁 6個月。點解咁嚴？咪係擔心駕駛者揸車時掛住睇電視，連路都唔睇囉。
2 HID要審批
車頭大燈用上俗稱 HID嘅白光燈當然令成架車更醒目，不過除非頭燈係跟車原裝入口，經運輸署審批，否則貪得意自己換，隨時惹麻煩。由於 HID嘅白光較傳統鎢絲頭燈光亮度高出一倍，自行安裝下，可能會因為光亮度又或者調校角度問題，影響對頭行車司機，燈光顏色偏藍更加唔得。雖然車主要由普通頭燈換上 HID可向運輸署申請，不過話明畀大家知，呢類改裝絕大多數符合唔到運輸署規定，法例生效至今從未有獲批個案。
3 燈號咪亂玩色
燈號一向被視為道路語言，所以一些燈號顏色都有其意思，例如倒車燈係白色，煞車燈係紅色，而大燈一定係白燈或者黃燈，指揮燈就一定要係黃燈。如果車主胡亂將煞車燈改成其他顏色，就算你打咗燈，其他車隨時唔知你想點，意外就往往因此而生，所以千祈唔好貪得意轉色。
4 車牌字體禁花臣
樣樣都唔改得，整靚個車牌應該無問題啩！錯，一樣陷阱重重，其實政府於上世紀五十年代對車牌字體有一套標準，不過當年無電腦字，字體都係手寫出嚟，所以今時今日基本上你用電腦字嘅字體已經唔合規格。雖則呢方面執法無咁緊，不過對於一啲美術字、凸字又或者圓字，警察一樣照捉。仲有一樣就係車牌嘅反光度，必須規定參照英國 BS AU145a制訂，所以前後車牌都必須註明「 BS AU145a」字眼先算得上合格，所以有時換車牌時，記得望多兩眼。
5 玻璃窗最緊要透
驚人偷拍，自己屋企就可以拉埋窗簾，不過揸車出街，玻璃就最緊要透光度足。雖然政府早年已經放寬汽車玻璃窗透光度，不過只限司機位以後玻璃，透光度可到百分之四十四，至於司機位同擋風玻璃則維持百分之七十，不過講明先，現時日本水貨私家車的黑玻璃透光率只得百分之二十五，就算你想用偏黑色嘅玻璃貼紙，都要先搞清佢嘅透光度。
No comments:
Post a Comment