無天窗無加減波　月供$2,700輕鬆上車

2011年09月08日

(9人)
瀏覽人次：13,700

當元朗樓都要賣六七千元一呎之際，樓價升幅實在高到嚇人，買樓上車首選已經苦無出路，亦無心水可言。至於上真車首選，卻有一個筍盤推介畀大家，豐田 Ractis Young Edition擺明針對年輕人市場，車價低至十五萬幾，月供只需$2,700，無論力量及實用程度都跟豪華版 Ractis Verso相同，不過就上車上得更易更輕鬆。

記者：許維雅　
攝影：伍慶泉
Model： Hailey@GME

儲物格收納小物

放大圖片

每次去到日本睇見橫街小巷泊滿的可愛小車，既色彩繽紛，選擇又多，的確令一眾香港年輕人羨慕。但同樣寸金尺土的香港，車仔款式於市場上選擇唔算多，見到滿街都是本田 Jazz，你唔悶我都悶！其實當中早兩年才引入香港的豐田 Ractis，確實係不錯的選擇，於舊年轉款後推出的 Ractis Verso，配上一個全景天幕頂天窗的新面貌就更加有吸引力。
不過若然你想上車更容易，不妨可以考慮放棄天幕頂天窗，揀車價差不多平$28,000的 Ractis Young Edition。基本上，前尖後方大眼仔的可愛外形完全一樣，高度達 1,585毫米所帶來的超實用車廂空間繼續讓你盡情發揮，即使坐滿五個人依然放得落三個大行李箱，試問有邊部車仔可以做得到。想放巨型物件如單車等，只要輕拉尾廂手柄摺合後座，便可騰出 1,388公升儲物空間。揭開 Young Edition版本的尾廂層版，更多了一個多功能儲物格，好讓你容易收納不同尺碼小物，令你的尾廂更整齊企理，十分貼心。

放大圖片

■尾廂多了一個多功能儲物格，方便收藏小物。

放大圖片

■車頭採用立體大眼頭燈，兩個版本完全一樣。

放大圖片

■啟動 Sport按鈕， CVT動感模式立刻帶來更暢快的操控感。

兩版本月供差$500

放大圖片

■軚環無包真皮，不過驟眼睇分別不大。

心水清的車主都估到以日本車 Options價而言，$28,000又何止少了一個天窗咁簡單，沒有加減波撥片的皮軚環、恒溫冷氣沒有花粉過濾器、輪圈保留 16吋，但由合金換上輪圈蓋，這三項 Options相對實際用途較低，加上刻意模仿合金軨的輪圈蓋不算醜陋，還可接受，唯獨中控台的冷氣按鈕改為三圈扭動式設計，感覺就有點過時。
至於沒有了自動開關頭燈功能、智能車匙及按鈕式啟動系統，雖然相對較不便，但仍明白將貨就價實屬難免。因為車價只需十五萬幾的 Ractis Young Edition，所配備的 Options依然不少，如電摺鏡、 7吋輕觸式屏幕娛樂音響系統及 CVT動感模式等一概保留，最重要係 1.5公升引擎配合七速波箱，力量表現同樣既爽快又環保。當你內心正掙扎平版 Ractis所欠的好似若有所失時，就等我計埋條數話你知，兩個版本以 5年供款期計算，每月供款相差接近$500，月供二千幾定三千幾呢個心理關口，由閣下慢慢自算喇！

放大圖片