超特大天幕　無敵好風光

2010年12月04日

(6人)
瀏覽人次：9,633

揀選細車仔，豐田 Ractis是被考慮之列，但要在競爭激烈的細車市場中突圍而出，新一代 Ractis Verso手執更大本錢，除設計及配備升級外，還有一塊可以抬頭遠望無敵靚景的特大玻璃天幕，猶如小宅都有豪華大露台般叫人興奮。

記者：許維雅
攝影：林栢鈞
Model： Sukmi

天幕全頂　無敵透視靚女

扁麪包摺後座　一手搞掂

放大圖片

舊年才登陸香港的豐田 Ractis咁快轉款？坦白講，起初相約拍攝時，實在無乜期望，全因覺得只屬十幾萬車價的車仔，廠方大多不願投放太多資源去革新，可以變化的確實不多，以為改了點點頭頭尾尾就已經算是新款。
當親身看見這部全新彩藍 Ractis Verso後，發現我錯了！雖然依舊是前尖後方的可愛車形，但就輕輕長了 40mm、矮了 55mm，令車形向橫發展，無咁似麪包車。加埋全新設計的立體頭燈，又換上新款一字式鬼面罩及車頭擾流，樣子立刻 Trendy番晒。繼續由車頭慢慢掃落去，車身線條及側鏡都變得更流線型，就連車尾都唔同晒，全新 LED高置煞車燈及尾燈組合，配合新設計的車尾泵把及外形，令方尾造型無咁突兀之餘，又添上不少新鮮感。勿以為 Ractis扁了，就會影響其尾廂儲物空間，毋須摺合後排座椅，仍然放得落三個大篋！廠方更細心改良了摺合後座的設計，只要輕輕一拉側面手柄，立刻變了一張如床的大平台，方便到暈，抵讚！

天幕玻璃頂　同級獨有

放大圖片

■全景玻璃天幕頂，最受惠的當然是後座乘客。

揀車仔要夠實用、外形討好是角力的最大賣點，不敢對內櫳奢望太多，簡潔舒服已滿足。不過 Ractis今趟卻不甘示弱， Verso版增添一個特大全景玻璃天幕頂作賣點。跳入車廂，打開電動太陽擋，抬頭一望，有埋中環無敵靚景配襯，好似屋仔多個大露台般，連攝影師同 Model都興奮得嘩鬼叫，又值得一讚！
此外，新增了 7吋輕觸式屏幕兼備娛樂及藍芽電話功能，換上皮波棍的中控台設計有點像 Wish，而皮軚環又新添加減波撥片，升級配備合格有餘。不單止外表革新，連引擎汽缸容積都增加了 200cc至 1.5公升，馬力由 87匹增至 109匹、扭力由 116Nm增至 138Nm，再配合新添的七速波箱、 CVT動感模式系統，操控比之前爽快得多。今次雖未有時間測試新加的 ECO環保節能系統及 Sport模式分別有幾大，但已完全感受到豐田再次起義，力抗歐洲細車侵佔市場的決心！

放大圖片